Натпресс
Израиль иадыгэ къуаджэу Кфар-Камэ къикIыгъэ футбол командэр мы мафэхэм Адыгэ Республикэм щыI. Футболистхэм тикъушъхьэхэр, псыхъо чъэрхэр зэрагъэлъэгъугъэх, Адыгеим и Лъэпкъ музей щыIагъэх, ныбджэгъу ешIэгъухэр яIагъэх. Кощхьаблэрэ Кфар-Камэрэ якомандэхэр зызэдешIэхэм, пчъагъэр 4:3-у Израиль къикIыгъэ футболистмэ текIоныгъэр къыдахыгъ. ЗэIукIэгъур гъэшIэгъонэу кIуагъэ. Кощхьаблэмэ 2:1-у ахьызэ, 3:2-у Кфар-Камэ щыщхэр текIохэу уахътэ къыхэкIыгъ. ЗэIукIэгъур кIэухым зыщыфэкIоным кощхьаблэмэ къэлапчъэм Iэгуаор дадзи, пчъагъэр 3:3 хъугъэ. ТекIоныгъэр зыхьыщтыр язэрэмыгъашIэу командэхэр зэнэкъокъугъэх. Ацумыжъ Нал Кощхьаблэ икомандэ икъэлапчъэ Iэгуаор дидзи, 4:3-у Израиль къикIыгъэмэ ешIэгъур ахьыгъ. ЛIыпый Аслъан, ГъоркIожъ Адам, Тхьаухъо Анди бысымхэм якъэлапчъэ зэрызэ Iэгуаор да¬дзагъ. — Кощхьаблэ дахэу къыщытпэгъокIыгъэх, ешIэгъур зытэухым, Iанэ къытфызэIуахи тахьэкIагъ, тикъэбархэр къызэфэтIотагъэх, — ягупшысэмэ тащагъэгъуазэ ХъутIыжъ Аслъан, ЛIыпый Аслъан, нэмыкIхэми. — Тхьаегъэпсэух… АР-м и Лъэпкъ музей футбол командэр зэкIом шIэныгъэмкIэ отделым иIофышIэ шъхьаIэу, археолог цIэрыIоу Тэу Аслъан Адыгеим итарихъ къэбархэр, музеир къызызэIуахыгъэм ыуж зэхъокIыныгъэу фэхъугъэхэр, адыгэ унагъохэр нахьыпэкIэ зэрэпсэущтыгъэхэр, нэмыкIхэри къафиIотагъэх. ХьакIэмэ анахьэу ашIогъэшIэгъоныгъэх тилъэпкъ нахьыпэкIэ къыгъэгъунэщтыгъэ чIыгур зыфэдагъэр, адыгэхэр итэкъухьагъэхэу дунаим зэрэщыпсэухэрэр, зэлъыIэсыкIэ амалэу яIэхэр. А. Тэум упчIэмэ джэ¬уапхэр аритыжьыгъ. Израиль къикIыгъэ футболистхэр адыгэ кIалэх, зэкIэми адыгабзэр ашIэ. Мы мазэм и 11-м нэс республикэм щыIэщтых. Сурэтым итыр: Тэу Аслъан музеим къэкIогъэ футболистмэ лъэпкъ къэбархэр къафеIуатэх. Адыгэ Макъ
Кфар-Камэ ифутбол командэ(фото-Натпресс)
