«Зэкъошыныгъэм» и Дунэе фестивалэу къалэу Налщыкъ щыкIуагъэм Адыгэ Республикэм икIэлэцIыкIу орэдыIо купэу «Ащэмэзыр» хэлэжьагъ. «О ужъуагъу» зыфиIорэ Урысые фестивалэу гъэтхапэм Налщыкъ щыкIогъагъэм мы ансамблэр иIэпэIэсэныгъэкIэ къыщыхагъэщыгъагъ. Зэнъэкъокъум текIоныгъэр къызэрэщыдихыгъэм къыхэкIэу орэдыIо купыр зичэзыу фэстивалыми хэлэжьэнэу рагъэблэгъагъ.
Дунэе Адыгэ Ассоциацием хабзэ зэрэхъугъэу мыщ фэдэ фестивальхэр зэхещэ. Иорданием, Тыркуем, Кореем къарыкIыгъэ орэдыIо-къэшъокIо ансамблэхэм ахэтэу Адыгеим илIыкIохэм зыкъагъэлъэгъуагъ. «Фэсапщи», «Сикъош», «Озы Мурат», «Саусэрыкъу», нэмыкI лъэпкъ мэкъамэхэри фестивалым къыщаIуагъэх. Орэдыжъхэм язехьакIо ныбжьыкIэхэм яшэн-зэхэтыкIэхэр, якультурэ зыфэдэр зэрашIогъэшIэгъоныгъэр зэхэщакIэхэми мэфэкIым хэлэжьагъэхэми къыхагъэщыгъ.
Концертхэм адакIоу фестивалым зыгъэпсэфыгъо уахътэри къыдхэлъытэгъагъ. Къэбэртэе-Бэлъкъар республикэм ичIыпIэ дахэхэр фэстивалым хэлэжьагъэхэм къарагъэплъыхьагъэх.
«Зэкъошыныгъэм» ифестиваль джыри нэмыкI къэгъэлъэгъонхэр къызэрэкIэлъыкIощтым «Ащэмэзым» ихудожественнэ пащэу Бастэ Асиет ицыхьэ телъ. Мы купым иорэдхэр зытет дискыри бэмышIэу къыдэкIыгъ, программэ гъэнэфагъэ иIэу дэкIыгъохэр зэрашIын алъэкIыщтхэр ащ къеушыхьаты.
Адыгэ Радиом къытыгъэ къэбар
natpressru.ru
