Тарихъыр, шэн-хабзэхэр анахьышIоу къытлъызыгъэIэсыжьырэмэ лъэпкъ искусствэр ащыщ. Адыгэ Республикэм ифестиваль-зэнэкъокъоу «Адыгеим ибзэпс жъынчхэр» Мыекъуапэ зэрэщыкIуагъэр зэфэтхьысыжьзэ, еплъыкIэ зэфэшъхьафхэр зэрэщыIэхэр къыдэтэлъытэ.
Адыгэ Республикэр илъэс 20 зэрэхъурэм фэгъэхьыгъэ фестивалым музыкант 65-рэ, ансамбли 6, нэбгырэ зырызхэр 30 фэдиз хъухэу хэлэжьагъэх. ЗэхэщэкIо купым итхьаматэу, АР-м культурэмкIэ иминистрэу Чэмышъо Гъазый къызэриIуагъэу, «Къэгъэгъэштахьэмрэ» «Адыгеим ибзэпс жъынчхэмрэ» зы мафэм зэрэзэхащагъэхэм шIуагъэ къытыгъ.
«Къэгъэгъэштахьэр» я 13-у дгъэмэфэкIыгъэ. Хэхъоныгъэхэр ышIыгъэх, цIыфхэм нахь ашIогъэшIэгъон хъугъэ. Къэгъагъэм имэфэкI адыгэмэ афэдэу зыгъэмэфэкIырэ лъэпкъыбэ дунаим тетми тшIэрэп. Лъэпкъым дэхагъэу хэлъыр, шIушIагъэу иIэр мэфэкIым хэолъагъо. Къэгъагъэм тищыIэныгъэ чIыпIэу щигъотыгъэр музыкэмкIэ нахьышIоу къэпIотэн олъэкIы.
Чэмышъо Гъазый зэрилъытэрэмкIэ, лъэпкъым итрадиционнэ культурэ бай дэдэу зэрэщытыгъэр нахьышIоу цIыфмэ алъыбгъэIэсыным, хэлажьэрэмэ яIэпэIэсэныгъэ къызэIуахыным афэшI мэфэкIхэр зэгъусэхэу тапэкIи зэхащэнхэр нахьышIу. Лъэпкъ зэфэшъхьафхэр мэфэкIым чанэу хэлэжьагъэх.
Ижъырэ лъэпкъ музыкальнэ Iэмэ-псымэхэм апыщэгъэ ныбжьыкIэхэр хэпшIыкIэу нахьыбэ хъугъэх. ШыкIэпщынаохэр нахь зыкъызэIузыхырэмэ ахэтэлъытэх. Лъэцэрыкъо Кимэ ыцIэ зыхьырэ республикэ кIэлэцIыкIу еджапIэм искусствэмкIэ зыщагъасэ. Къэлэ паркым, нэмыкI цIыф зэхэхьапIэхэм концертхэр къащатынхэ алъэкIыщт.
ЩытхъуцIэхэр къыдэзыхыгъэхэр
ЗэлъашIэрэ орэдыIоу Дзыбэ Мыхьамэт фестиваль-зэнэкъокъум пщынаоу хэлэжьагъ. Гран-прир ащ фагъэшъошагъ. Лъэпкъ мэкъамэхэр пчэгум щигъэжъынчыхэу зыфежьэм, орэдыIоуи зэрэщытыр къыдалъытэзэ, искусствэр зикIасэхэр Iэгу фытеуагъэх.
Апэрэ степень зиIэ дипломхэр зыфагъэшъошагъэхэр: Теуцожь районым къикIыгъэ пщынаоу Еутых Къадырхъан, Шэуджэн районым ипщынаоу Чэтэжъыхьэ Нурбый, адыгэ лъэпкъ музыкальнэ Iэмэ-псымэхэр зыхэт ансамблэу «Уджыр» (Тэхъутэмыкъое район, художественнэ пащэр КIыргъ Юр), Красногвардейскэ районым щыпсэурэ Елена Лукьянченкэр — домрэмкIэ орэдышъохэр къыригъэIуагъэх.
Ижъырэ лъэпкъ музыкальнэ Iэмэ-псымэхэр искусствэм нахьышIоу щызыгъэфедэхэрэр зэхэщакIомэ къыхагъэщыгъэх. Ащ фэд Адыгэкъалэ къикIыгъэ шыкIэпщынаоу Абыдэ Артур. Шэуджэн районым щыпсэурэ ШъэоцIыкIу Рэмэзани сырынэмкIэ адыгэ мэкъэмэ дахэхэр ыгъэжъынчыгъэх. Мыекъопэ районым имузыкантэу Юрий Руденкэм жалейкэмкIэ урыс мэкъамэхэр къыригъэIуагъэх. Нэбгырищыми дипломхэр, ахъщэ шIухьафтынхэр аратыгъэх.
ЯтIонэрэ степень зиIэ лауреат хъугъэмэ ащыщ Тыркуем къыщыхъугъэ Тыркоо Эрхьан, Мыекъуапэ ар щэпсэу, ансамблэу «Жъыум» хэт, ижъырэ адыгэ орэдхэр къеIох, щыкIэпщынэр къыгъэгущыIэу тэлъытэ. Кощхьэблэ районым ипщынаоу Даур Казбеки ятIонэрэ степень зиIэ дипломыр фагъэшъошагъ. Пщынэо ныбжьыкIэхэу, искусствэхэмкIэ Адыгэ республикэ колледжым истудентхэу Агъырджэнэкъо Ибрахьимэрэ Щыкъ Фаризэтрэ зэгъусэхэу фестивалым хэлэжьагъэх, ятIонэрэ чIыпIэр зыхьыгъэмэ ащыщых.
Красногвардейскэ районым иансамблэу «КъегъаIу, пщынэр!» зыфиIорэми ятIонэрэ чIыпIэр ыхьыгъ.
Теуцожь районым иансамблэу ГутIэ Заурбый зипащэм, Джэджэ районым ипщынаоу Нэгъой Юрэ ящэнэрэ степень зиIэ лауреат щытхъуцIэхэр афаусыгъэх.
Апэрэ степень зиIэ дипломхэр аратыжьыгъэх Красногвардейскэ районым иансамблэу «Эльбрусым», ГъукIэлI Нэфсэтрэ Виктор Емельяновымрэ. Фестивалым идипломхэр зэратыжьыгъэхэм ащыщых къамылапщэу КIыргъ Юрэ, пщынаохэу Симболэт Валерэ, Зэфэс Гощэмыдэ, Кощбэе Руслъанэ, Онэунэкъо Руслъанэ, Шэуджэн Адамэ, нэмыкIхэри.
ЕплъыкIэхэр
КIыргъ Юр:
— Къамылапщэхэр нахьыбэ хъухэу фестивалым хэлажьэхэ, ныбжьыкIэ колледжым дэгъоу щырагъаджэхэ сшIоигъу. ЗэхэщакIомэ лъэшэу сафэраз.
Абыдэ Артур, Тыркоо Эрхьан:
— Фестивалыр еджапIэ тфэхъугъ, нахьыбэрэ тыхэлэжьэнэу тыфай.
Щыкъ Фаризэтрэ Агъырджэнэкъо Ибрахьимэрэ:
— Пщынэо гъэшIэгъонхэр фестивалым щытлъэгъугъэх, ныбжьыкIэхэр искусствэм хэщэгъэнхэм тыпылъыщт.
Даур Руслъан:
— Сэ сымузыкантэп, ау сшIогъэшIэгъонэу сядэIугъ.
СтIашъу Юр, Пэрэныкъо Чэтиб:
— Фестивальхэм тяплъызэ, тиIофшIэн нахь дэгъоу зэрэзэхэтщэщтым тырагъэгупшысагъ.
Евгений Омельченко:
— Кубань къэзэкъ хорым илъэс 26-рэ сыхэтыгъ. Мыекъуапэ щыслъэгъугъэр зэзгъэпшэщтыр сшIэрэп.
Симболэт Валерий:
— МэфэкI гъэшIэгъон тфызэхащагъ. Дипломым изакъоп, слъэгъугъэмрэ зэхэсхыгъэмрэ сагъэгушIуагъ.
Лъэпкъ гупшысэр зыгъэбэгъорэ фестивальхэм, зэхахьэхэм Адыгэ Республикэм икъэралыгъо гъэпсыкIэ агъэпытэ.
Сурэтхэр фестивалым щытезыхыгъэр ЕмтIылъ Нурбый.
natpressru.ru
