Натпресс
Адыгэ Республикэм и Лъэпкъ музей ыпашъхьэ щыкIогъэ зэхахьэм Парламентымрэ Правительствэмрэ якъулыкъушIэхэр, къалэу Мыекъуапэ ыкIи районхэм яадминистрациемэ ялIыкIохэр, республикэм щыпсэурэ лъэпкъмэ яобщественнэ движениехэр, хэкум къэзыгъэзэжьыгъэхэр, тилъэпкъэгъухэу IэкIыб хэгъэгумэ къарыкIыгъэхэр, культурэм иIофышIэхэр, лъэпкъ шIэжьым ыгъэгумэкIыхэрэр хэлэжьагъэх.
МэфэкI зэхахьэр адыгэ джэгукIэ аухыгъ. Израиль къикIыгъэ футболистхэри ащ щыуджыгъэх.
МэфэкI шъуашэм диштэу республикэм и Лъэпкъ музей Iупэ дахэу зэIыхыгъ. Хэкум къэзыгъэзэжьыгъэмэ афэгъэхьыгъэ шIуфэс тхыгъэхэр музей чIэхьэгъум, нэмыкIхэми ащыолъэгъух. Лъэпкъ мэкъамэхэр пчэгум щэIух. ЦIыфхэр нэгушIох. Пчыхьэр фабэми, тIысыпIи, уцупIэ тэрэзи зымыгъотыжьэу ахэтыр макIэп.
Ацумыжъ Айбек, Нэпсэу Нихьад, Едыдж Батырай, СтIашъу Яхьяр, нэмыкIхэу хэкум къэзыгъэзэжьыгъэмэ гущыIэгъу тафэхъу. Едыдж Мэмэт Тыркуем хьэкIакIо щыIагъ, мэфэкIым ехъулIэу Мыекъуапэ къэкIожьыгъ.
Гъоухэр пчэгум къехьэхэшъ, макъэу агъэIурэм цIыфхэр зэрещалIэх. Адыгеим иартистхэу Уджыхъу Марыет, Мурэтэ Чэпай, Гъонэжьыкъо Асыет, АфэшIэгъо Фаинэ, Сихъу Вячеслав лъэпкъ гупшысэр щыпхыращызэ усэхэм къяджэх. Адыгэ чIыгум идэхагъэрэ иIэшIугъэрэ IупкIэу къаIуатэ, лъэпсэгъэкIод заоу пачъыхьэм тилъэпкъ къыришIылIагъэм адыгэмэ тхьамыкIагъоу къафихьыгъэр нэгум къыкIагъэуцо.
Урысыем тыщыщ
Адыгэ Республикэм культурэмкIэ иминистрэу, Адыгеим и Къэралыгъо шIухьафтын къызыфагъэ-шъошагъэу, Косовэ тилъэ¬пкъэгъухэр къищыжьыгъэнхэм чанэу хэлэжьэгъэ Чэмышъо Гъазый ти Президентэу ТхьаIущынэ Аслъанрэ Правительствэмрэ ацIэкIэ зэхахьэм хэлажьэрэмэ къафэгушIуагъ. Адыгеир Урысыем хэтэу зэрэпсэурэр ащ къыIуагъ. Тарихъым инэкIубгъомэ зафигъази, АР-м иапэрэ Президентэу Джарымэ Аслъан Косовэ тилъэпкъэгъухэр къищыжьыгъэнхэм фэшI федеральнэ къулыкъушIэхэр Iофым къызэрэхигъэлэжьагъэхэр, щыIэныгъэм епхыгъэ зэхэщэн Iофхэр ти Президент ишIуагъэкIэ гъэцэкIагъэ зэрэхъугъэхэр щысэ зэфэшъхьафхэмкIэ къыIотагъэх. Зэхахьэм къыщыгущыIагъэх Адыгэ Республикэм и Парламент и Тхьаматэ игуадзэу Сапый Вячеслав, Мыекъопэ районым иадминистрацие ипащэ игуадзэу Галина Храмовар, нэ¬мыкIхэри. Хэкум къэкIожьыгъэмэ ятарихъ чIыгу рэхьатныгъэ щагъотыным, янасып зыдалъэгъужьэу щыIэнхэм ямэхьанэ зыкъызэриIэтырэр зэкIэми хагъэунэфыкIыгъ. КъэкIожьыгъэхэр хэкум хэгъэгъозэжьыгъэнхэм пылъхэу общественнэ пшъэрылъхэр зыгъэцакIэрэмэ ащыщых Парламентым идепутатэу Шъхьэлэхъо Аскэр, шIэныгъэм дэлэжьэрэ МэщфэшIу Нэдждэт, хэкум къэзыгъэзэжьыгъэ СтIашъу Яхьяр. Ахэр зэхахьэм къызэрэщыгущыIагъэхэм тедэIугъ, зэфэхьысыжьхэри тшIыгъэх. Къэзыгъэзэжьыгъэр ба? ЕгъэзыгъэкIэ, гъэпцIагъэ зыхэлъ IофкIэ тилъэпкъэгъу мин пчъагъэмэ хэкур къабгынагъ. Апэу Тыркуем къыщыуцугъэх, рэхьат ащ щызымыгъотыгъэхэр Сирием, Иорданием, Германием, фэшъхьаф хэгъэгухэми арысы хъугъэх. СтIашъу Яхьем къызэриIуагъэмкIэ, Тыркуем тилъэпкъэгъу 418-рэ, Сирием 187-рэ, Косовэ 165-рэ, Иорданием 40, Израиль нэбгырэ заулэ къарыкIыжьыгъ. КIалэхэри къапыфагъэхэу хэкум щэпсэух. Обшественнэ движениеу «Адыгэ Хасэм» итхьаматэу Хьэпэе Арамбый тилъэпкъ зиужьыжьынымкIэ Iофым хэлажьэрэмэ зэрафэразэр зэхахьэм къыщиIуагъ. Ащ да¬кIоу А. Хьэпаем хигъэунэфыкIыгъ Мэфэхьаблэ къэзыгъэзэжьыгъэ тилъэпкъэгъухэр зычIэсыщт унэхэр джырэ нэс зэрамыухыгъэхэр. УнитIу къэнагъэр зы-чIэмыхьажьыгъэхэу. Ахэр аухыхэу унэчIэхьажьхэр унагъомэ зашIыкIэ тэри тыгу нахь псэфыщт. МэщфэшIу Нэдждэт шэнышIу зэрэфэхъугъэу, лъэпкъ шIэжьым епхыгъэ усэмэ къяджагъ. Хымэ жьы чъыIэр къяокIы Адыгеим итхэкIо цIэрыIоу МэщбэшIэ Исхьакъ тилъэпкъэу дунаим щитэкъухьагъэм ехьылIэгъэ иусэу Н. МэщфэшIур къызэджагъэм рэхьатэу уедэIун плъэкIырэп. Хымэ жьы чъыIэр къяокIэу тилъэпкъэгъухэр Iэ-
кIыб хэгъэгумэ зэращыпсэухэрэр къутэмэ гъугъэр чъыгым къызэрэгозырэм фигъадэзэ, лъэпкъ шIэжьым икуупIэ ухещэ. Къэгъэзэжьын Iофым МэщфэшIу Нэдждэт къытегущыIэзэ, къыддэхъугъэр мымакIэу ылъытагъ. Ау щыкIагъэу, гумэкIэу щыIэмэ тябгъукIон тымылъэкIыщтэу ащ елъытэ. Къэзыгъэзэжьыгъэмэ яунэу къафагъэшъошагъэу Мыекъуапэ дэтыр аIахыжьыным пылъых. Косовэ къикIыжьыгъэ тилъэпкъэгъухэр хэгъэгоу изыфыгъагъэм икъэралыгъо унашъокIэ хэкум къагъэзэжьыгъэ хъугъэу мэпсэух. Урысыеу зэрафыгъагъэхэм ибыракъи, игерби тилъэпкъэгъумэ къаштэжьыгъэх. Арышъ, политикэ мэхьанэ Iофым хэлъ. Хэкум къэзыгъэзэжьыгъэхэр хэгъэгъозэгъэнхэм пылъ Унэм общественнэ организациехэр чIэтых. КIэлэцIыкIу IыгъыпIэу нахьыпэкIэ щытыщтыгъэм унэу тилъэпкъэгъухэр зычIэсхэу, общественнэ организациехэри зычIэтым имэхьани дунэе къэбар хъугъэ. Парламентымрэ Правительствэмрэ ахэтхэм МэщфэшIу Нэдждэт закъыфигъази къариIуагъ Iофэу ашIэрэр гъунджэм фэдэу щыIэныгъэм къызэригъэ-лъэгъощтыр. Лъэпкъым фэшъыпкъэмрэ лъэпкъым егуаорэмрэ гъунджэм къыгъэлъэгъощтых. Тилъэпкъэгъухэу IэкIыб хэгъэгумэ арысхэм адэлэжэнэу Парламентым цIыф гъэнэфагъэ иIэн фаеу, Правительствэм ащ фэдэ Комитети щызэхащэмэ яшIуагъэ къэкIощтэу ащ ылъытагъ. КIэлэцIыкIу IыгъыпIэ 30 фэдиз зэфашIыжьыгъэу къалъытэ. Арэу щытмэ, хэкум къэзыгъэзэжьыгъэхэр хэзыгъэгъозэжьырэ унэр аIахыжьыным, икIэрыкIэу кIэлэцIыкIу IыгъыпIэ ашIыжьыным фэшI зэкIэми апэ рарэмыгъэуцу, хэкIыпIэ къамыгъотынэу щытэп. Адыгэ джэгур дахэ Лъэпкъым ичIыгу къэзыухъумагъэхэм афагъэуцугъэ мыжъом ыпашъхьэ къэгъагъэхэр кIэлъызы-рылъхьагъэмэ ащыщых Парламентым, Правительствэм якъулыкъушIэхэр, общественнэ движениемэ ахэтхэр. МэфэкI концертэу щыIагъэм хэлэжьагъэх Шэуджэн, Тэхъутэмыкъое, Красногвардейскэ, Мыекъопэ районхэм, къалэу Мыекъуапэ, нэмыкIхэми ясамодеятельнэ купхэр. ОрэдыIохэу Андзэрэкъо Чеслав, Лъэчэ Альберт, Дзыбэ Фатимэ, Нэхэе Фатимэ, Сихъу Аскэр, Дзыбэ Мыхьамэт, Мирзоева Джамилие, нэмыкIхэми пчыхьэзэхахьэр къагъэдэхагъ. Пщынаоу Унэрэкъо Аскэрбый къыригъэIогъэ мэкъамэхэм гур аIэтыгъ. Артистэу Джолэкъо Рэщыдэ зэрищэгъэ «Адыгэ джэгум» ныбжьыкIэхэр къыщышъуагъэх, щызэнэкъокъугъэх, къэшъокIо анахь дэгъухэу къыхахыгъэмэ шIухьафтынхэр аратыгъэх. Пшъэшъэ къэшъокIо анахь дахэу зэхэщакIомэ къыхахыгъэр Мурад Сирин. Зэхахьэм адыгэ шхыныгъохэр щашIыгъэх, цIыфмэ зыщагъэпсэфыгъ. ЕмтIылъ Нурбый. Адыгэ Макъ
