Китаим илIыкIохэр Мыекъуапэ щыIагъэх

Мы аужырэ уахътэм Мыекъуапэ нэмыкI къэралыгъохэм якъалэхэм зэдэпсэуныгъэм фэгъэхьыгъэ зэзэгъыныгъэхэр адишIыхэу ригъэжьагъ.

Ащ фэдэу мы мафэхэм Китаим икъалэу Маньчжурием къикIыгъэ делегацие Адыгеим икъэлэ шъхьаIэ щыIагъ. Купым ипэщагъ Маньчжурием имэрэу Ду Сюецзюнь.

ЗэIукIэгъоу къэлэ администрацием щыкIуагъэм экономикэм, сатыум, наукэм ыкIи культурэм афэгъэхьыгъэ зэзэгъыныгъэм щызэдыкIэтхагъэх. Туризмэм мы зэIукIэгъум мэхьанэ щыратыгъ, зэзэгъыныгъэми ар щыхагъэунэфыкIыгъ.

Делегацием тикъалэ дахэкIэ ыгу къызэринэжьыщтым бысымхэр пылъыгъэх. Къалэр хьакIэхэм къарагъэплъыхьагъ, Адыгэ къэралыгъо университетым икIэлэегъаджэхэм аIуагъэкIагъэх, Лъэпкъ музеир ара-гъэлъэгъугъ, къалэм иIофшIэпIэ анахь инхэм ащыIагъэх.

БлэкIыгъэ илъэсым Мыекъуапэ икIыгъэ делегациер Китаим щыIагъ. Джы ащ къикIыгъэ купыр Мыекъуапэ къызэрэкIуагъэр лъэныкъуитIур зэрэзэгурыIуагъэм ишыхьатэу плъытэн плъэкIыщт.

Адыгэ Макъ

Маньчжурие(Китай)