Мэлылъфэгъум и 25-м сыхьтыр 6-м Адыгэ Ныпэм имэфэкIым къуаджэмэ къарыкIыгъэхэри, къэлэдэсхэри Мыекъуапэ игупчэ шъхьаIэ щызэрэугъоищытых. КъэлэдэхьапIитIа, ща, плIа агъэфедэщтыр джыри гъэнэфагъэп, ау машынэмэ арысхэу, шымэ атесхэу, Адыгэ Ныпэхэр аIыгъхэу хьакIэхэр къеблъэгъэщтых. Адыгэмэ язэикI Ныпэр зэрэштагъэр, ащ итарихъ агу къызагъэкIыжьыкIэ Джэгум пчэгур рагъэубытыщт.
«НыбжьыкIэмэ къызэрэхалъхьэгъагъэу, Дунэе Адыгэ Хасэм ащ ыуж зэриштагъэу, — къытфиIотагъ мэфэкIым ипэгъокIэу Адыгеим и «Адыгэ Хасэ» итхьаматэу Хэпэе Арамбый, — мы мафэр, тэ адыгэхэмкIэ, тыдэ тыщыIэми, хэтэгъэунэфыкIы. Мыр иятIонэрэ гъогогъу. Ары шъхьаем, тэ, мыдыкIэ щыпсэухэрэмкIэ, а мафэм нахь тынаIэ тетынэу мэхъу, сыда зыпIокIэ, тызэрыс хэгъэгум Адыгэ Ныпэр ибыракъкIэ ыштагъ».
КъызэриIуагъэмкIэ, гупчэм нэбгырэ миным ехъу къекIолIэнэу ежэх. Арышъ, джэгур тэрэзэу кIоным пае, апэрэмкIэ, хьатьекIо-пщынэо тIурытIу-щырыщ къырагъэблэгъагъ, ятIонэрэмкIэ, адыгэ пщынэ шъыпкъэхэр, пхъэкIыч дэгъухэр къыздахьынхэу афагъэпытагъ.
natpressru.ru
