Натпресс
Израиль ит адыгэ къуаджэу Кфар-Камэ щапIугъэ Натхъо Бибарс Урысыем футболымкIэ ичемпионэу «Рубин» Казань зэраштагъэм, ащ илъэси 4 щешIэнэу зэзэгъыныгъэм зэрэкIэтхагъэм тигъэгушIуагъ. Тилъэпкъэгъу кIалэр Москва къызынэсым телефонкIэ гущыIэгъу фэхъугъэх Адыгэ Республикэм культурэмкIэ иминистрэу Чэмышъо Гъазыйрэ бизнесым пылъэу, Израиль къикIыжьыгъэу Нэпсэу Нихьадрэ.
Урысыем футболымкIэ и Кубок шъхьаIэ къыдэхыгъэнымкIэ Москва щызэIукIагъэх ЦСКА-мрэ «Рубинрэ». ЕшIэгъур зэрэкIуагъэм шIогъэшIэгъонэу Натхъо Бибарс еплъыгъ. ТелефонкIэ тызыфытеом Казань икомандэ зэраштагъэм игуапэу тыщигъэгъозагъ.Нэпсэу Нихьадрэ Натхъо Бибарсрэ Кфар-Камэ щыщых, дэгъоу зэрэшIэх. ГущыIэ фабэхэр зэраIохэзэ, ягъунэгъухэм, якъоджэгъухэм ящыIакIи тегущыIагъэх.
Натхъо Бибарс футболыр зэрикIасэр Адыгэ Республикэм культурэмкIэ иминистрэу Чэмышъо Гъазый къыдилъытэзэ, Урысыем икомандэ анахь лъэшэу «Рубин» зэрэрагъэблэгъагъэм фэшI фэ¬гушIуагъ. Уахътэ къыхигъэкIынышъ, Бибарс Адыгеим къакIо зэрэшIоигъор риIуагъ. Казань икомандэ Натхъо Бибарс аштэным пае зэхэщэн Iофхэр зыгъэцэкIагъэр мыекъопэ футбол клубэу «Зэкъошныгъэм» идиректор шъхьаIэу, спортымкIэ мастерэу Натхъо Адам. «Рубин» итренер шъхьаIэу Курбан Бердыевым А. Натхъор гъогогъуиплIэ IукIагъ. ЦСКА-мрэ «Рубинрэ» зэрэзэдешIагъэхэм Москва щеплъыгъ.
— Бибарс Израиль футбо¬лымкIэ ихэшыпыкIыгъэ ныбжьыкIэ командэ икапитан. Израиль ихэшыпыкIыгъэ хъулъфыгъэ командэ хэтэу джырэблагъэ Румынием дешIагъ, — къеIуатэ Натхъо Адамэ. — «Рубин» пшъэрылъ инхэр зыфигъэуцужьыгъэх. Европэм и Кубок икъыдэхын хэлажьэ. Опыт зиIэ футболистхэр, ныбжьыкIэхэу сэнаущыгъэ зыхэлъхэр къырагъэблэгъагъэх. «Кубань» Краснодар щешIэщтыгъэ Алан Касаевым къызэрэсиIуагъэмкIэ, «Рубин» зырагъэблагъэм командэм чIыпIэ щигъотыным пае къин макIэп къызэринэкIыгъэр.
Ишъыпкъэу Iоф зыдишIэжьыгъ. Тренер цIэрыIоу Курбан Бердиевыр мыекъопэ «Зэкъошныгъэм», Адыгеим ифутбол изытет къакIэупчIагъ, Натхъо Бибарс футболист дэгъу хъун ылъэкIыщтэу ылъытагъ.
Къэбар гушIуагъомэ зэу ащыщ Натхъо Бибарс Урысыем игражданин хъунэу зэрэфаер. Ащ епхыгъэ Iофхэр гъэцэкIэгъошIу зэрэмыхъущтхэр тэшIэми, охътэ бащэ ащ рамыгъэкъудыинэу ищыкIэгъэ тхылъхэм ягъэхьазырын къемыхьылъэкIынэу тэгугъэ.
Урысыем игражданствэ иIэ зыхъукIэ Натхъо Бибарс УФ-м ихэшыпыкIыгъэ командэ тренерхэм рагъэблэгъэн зэралъэкIыщтыр тэшIэшъ, «Рубин» дэгъоу щешIэнэу, игухэлъышIухэр къыдэхъунхэу фэтэIо. Опсэу, Бибарс! Уилъэпкъ итарихъ чIыгу къэбгъэзэжьыным фэшI апэрэ лъэбэкъур угу къызэрэуиIорэм тетэу пшIыгъэ, быслъымэн диныр олэжьы. Адыгабзэр дэгъоу ошIэшъ, тиадыгэ орэдхэм уядэIун плъэкIыщт. Спортыр шIу зыщалъэгъурэ лIакъом ущапIугъ. Баскетболист, футболист цIэрыIохэр Натхъохэм къахэкIыгъэх. Гъогоу къыхэпхыгъэм Тхьэм насып щыуегъэгъот. Мдыгэ Макъ
