Псыкъиуным епхыгъэ гумэкIыгъохэр дэгъэзыжьыгъэнхэм пае шIэгъэн фаехэм, непэрэ мафэхэм яхъулIэу Iофхэм язытет зыфэдэм зыщытегущыIэгъэхэ оперативнэ зэхэсыгъо Адыгэ Республикэм илIышъхьэу ТхьакIущынэ Аслъан тыгъуасэ зэхищагъ.
АР-м и премьер-министрэ игуадзэу Алексей Петрусенкэмрэ УФ-м ошIэ-дэмышIэ IофхэмкIэ и Министерствэ АР-мкIэ и ГъэIорышIапIэ ипащэу Гъунэжьыкъо Муратрэ Iофхэм язытет зыфэдэм республикэм ипащэ щагъэгъозагъ. Ахэм къызэраIуагъэмкIэ, Iофхэр нахь зыщыхьылъэгъэ къуаджэу Фэдз джырэ лъэхъаным псыр щызэкIэкIожьэу ригъэжьагъ.
Ау станицэу Дондуковскэм дэт уни 174-мэ псыр лъэшэу акIэхьагъ, ахэм нэбгырэ 316-рэ ащэпсэу, нэбгырэ 266-р агъэкощыгъэх.
НэмыкI чIыпIэ ащэгъэ цIыфхэм ящыкIагъэр зэкIэри арагъэгъоты, унэу къабгынагъэхэр ухъумэкIохэм къагъэгъунэх. Республикэм инэмыкI псэупIэхэу псыр къызыкIэхьагъэхэм IэпыIэгъу афэхъух, техникэр ыкIи кIуачIэр афекъу, сыхьат пэпчъ псыхъохэм адэт псым зыкъызэриIэтырэр ауплъэкIу.
Iофхэм язытет зэрэхьылъэр ТхьакIущынэ Аслъан къыхигъэщызэ, гумэкIыгъом идэгъэзыжьын фэгъэзэгъэ пстэуми яIофшIэн нахь агъэлъэшынэу, псыр къызыкIэогъэ цIыфхэм анаIэ атырагъэтынэу, ищыкIагъэ хъумэ, медицинэ е нэмыкI IэпыIэгъу арагъэгъотынэу къафигъэпытагъ.
adygvoice.ru
natpressru.ru
