ТхьакIущынэ Аслъан спутник телеканалэу «Нарт-ТВ» зыфиIорэм ипащэхэм аIукIагъ

Адыгэ Республикэм и Президентэу ТхьакIущынэ Аслъан Иорданием ит спутник телеканалэу «Нарт-ТВ» зыфиIорэм ипащэу Абыдэ Мэджыдэ, ащ игуадзэу Дэгъужьыкъо Мыхьамодэ, журналисткэу Анысэ Симэ тыгъуасэ аIукIагъ.

Зигугъу къэтшIыгъэ лIыкIо купыр мэфэ заулэ хъугъэ тиреспубликэ къызыкIуагъэр. Непэрэ мафэхэм яхъулIэу адыгэхэм ящыIэкIэ-псэукIэ фэгъэхьыгъэ материалхэр журналистхэм агъэ¬хьазыры.

Непэ адыгэхэм абзэ, якультурэ къаухъумэным ыкIи ащ хэхъоныгъэхэр рагъэшIыным пае анахьэу унаIэ зытебгъэтын фэе лъэныкъохэм бгъуитIур атегущыIагъ.

Иорданием щыпсэурэ адыгэхэм ацIэкIэ республикэм ипащэ хьакIэхэм сэлам фабэ къырахыгъ. Ахэм къызэрэхагъэ¬щыгъэм¬кIэ, непэ Адыгеим къыщыхъурэм ашIогъэшIэгъонэу тилъэпкъэгъухэр лъэплъэх. Анахьэу тилъэпкъ икультурэ, ыбзэ афэгъэхьыгъэ къэтынхэу «Нарт-ТВ»-м къыгъэхьазырхэрэм цIыфхэр ягуапэу зэреплъыхэрэр къаIуагъ. Ащ дакIоу тилъэпкъ ишэн-зэхэтыкIэхэм, тыбзэ, тикультурэ ябаиныгъэ дунаим щызэлъашIэныр пшъэрылъ шъхьаIэу зызэрэфагъэуцужьырэр журналистхэм къыхагъэщыгъ.

Тиреспубликэ щыпсэурэ адыгэхэм абзэ рыгущыIэнхэу, рытхэнхэу амалышIухэр яIэхэмэ, Иорданием щыпсэурэ тилъэпкъэгъухэр зэреджэщтхэ тхылъхэр, нэмыкI программэхэр икъу фэдизэу зэраIэкIэмылъхэр, ащкIэ бгъуитIур зэрэзэдэлэжьэн алъэкIыщтым къызэрэугъоигъэхэр атегущыIагъэх.

ГумэкIыгъоу къаIэтыгъэхэр дэгъэзыжьыгъэнхэм пае тилъэпкъэгъухэм амалэу щыIэмкIэ зэрадэIэпыIэщтхэр ыкIи ащкIэ непэ Адыгеим зи пэрыохъу зэрэщыщымыIэр ТхьакIущынэ Аслъан къыIуагъ. Iофыгъоу къэуцугъэхэм еплъыкIэу афыряIэр къыраIотыкIыгъ АР-м иминистрэхэу ЛIыхэсэ Мыхьамодэ, -Беданыкъо Рэмэзанэ, Нэтхъо Разыет, Чэмышъо Гъазый.

Джащ фэдэу Адыгеим гъэхъагъэу иIэхэр дунаим щызэлъашIэнхэм пае республикэм, бизнесым афэгъэхьыгъэ рекламэхэр Нарт-ТВ»-м къытынхэм зэрэфэхьазырыр хьакIэхэм къаIуагъ. Ащ фэдэ екIолIакIэм республикэм ипащи дыригъэштагъ.

ТХЬАРКЪОХЪО Адам.

Адыгэ Макъ