Тыркуем ит Адыгэ Хасэмэ афэкIоу Адыгеим и Президент иджэпсалъ

Тыркуем и Адыгэ хасэхэм я Зэфэс хэлажьэхэрэм афэкIо

Силъэпкъэгъу лъапIэхэр!

Адыгэ Республикэм ис цIыфхэм ацIэкIи сэ сшъхьэкIи гуфэбэныгъэ хэлъэу шIуфэс шъосэхы Тыркуем и Адыгэ хасэхэм я Зэфэс хэлажьэхэрэм.

Сэ зэрэслъытэрэмкIэ, зыщыпсэурэ хэгъэгум, чIыпIэмэ ямылъытыгъэу, адыгэ пстэумкIи анахь пшъэрылъ шъхьаIэу тиIэр тилъэпкъыбзэ, тишэн-зэхэтыкIэхэр, ти Адыгэ Хабзэ зылъэпсэ цIыфыгъэ шэпхъэ дахэхэр, тилъэпкъ изыкIыныгъэ къэтыухъумэнхэр ары.

НасыпычъагъэкIэ Тыркуе зихэгъэгу хъугъэ адыгэхэм охътэ шIукIае тешIагъэми, лъэпкъ нэшэнэ анахь дэгъухэр къаухъумэнхэ алъэкIыгъ, нэмыкI лъэпкъхэу зыхэфагъэхэм агурыIохэу, мамырэу адэпсэух, ащ дакIоу я Хэкужъ фыряIэ шIулъэгъу инми къыкIырагъэчырэп.

Мы аужырэ илъэсипшIым щыIэныгъэм фэхъугъэ демократическэ зэхъокIыныгъэхэм лъэпкъым зиужьыжьынымкIэ зыфэдэ къэмыхъугъэ амалхэр къатыгъэх.

ЩынэгъончъагъэмкIэ, экономикэ ыкIи культурнэ зэдэлэжьэныгъэмкIэ Урысые Федерациемрэ Тыркуемрэ непэ стратегическэ гъусэшIу зэфэхъугъэх.

Тихэгъэгухэм политикэмкIэ азыфагу илъ хъугъэ зэфыщытыкIэшIухэр анахьэу шIуагъэкIэ зыфэплъэгъунэу зытефэхэрэр Урысые Федерацием и Президентэу Д.А. Медведевыр, Тыркуем и Президентэу Абдулла Гюль, Урысыемрэ Тыркуемрэ я Правительствэхэм япащэхэу В.В. Путинымрэ Р.Т. Эрдоганрэ арых.

Тэ, Кавказым ыкIи IэкIыб къэралхэм ащыпсэурэ адыгэхэм, типшъэрылъ ин дгъэцакIэзэ, зыкIыныгъэрэ зэгурыIоныгъэрэ тазыфагу илъэу тихэгъэгухэр тапэкIи экономикэм, культурэм, политикэм алъэныкъокIэ нахь зэпэблагъэ хъунхэм тиIахьышIу хэтшIыхьан фае.
Мамырныгъэ, зэгурыIоныгъэ, щынэгъончъагъэ ыкIи зыпкъ итыныгъэ тазыфагу илъыхэмэ ары тилъэпкъ шIоигъоныгъэхэр дгъэцэкIэнхэ зытлъэкIыщтыр.

Анахьэу зызыфэзгъазэ сшIоигъор Тыркуем ис адыгэ ныбжьыкIэхэр ары. Тилъэпкъ игугъапIэ къыдэхъунымкIэ шъоры анахьэу пшъэдэкIыжьышхо зыхьырэр. Тызэрыгушхорэ тятэжъ пIашъэхэм щысэ атешъух!

Сыгу къыздеIэу сышъуфэлъаIо псауныгъэ пытэ, насып, щыIэкIэ-псэукIэ дэгъу шъуиIэнэу, мамырныгъэм, шIум ыкIи зэфагъэм шъуафэлэжьэнэу!

Лъытэныгъэ къышъуфэзышIэу,

Адыгэ Республикэм и Президентэу ТхьакIущынэ Аслъан