Украинэм и Парламент адыгэ лъэпкъгъэкIодыр ыштэнэу мы мафэхэм фэгъэзэныгъэ фашIыгъ. КIэлъэIум кIэтхагъэхэм ащыщ Адыгеим щыщ журналистэу ЩэшIэ Аслъан, тарихълэжьэу Абрэдж Альмир, Израиль щыщ политологэу Шмулевич Авраам, Дунэе Къушъхьэ Конгрессым икоординаторэу Дагъэстан щыщ Магомедов Магомед, КъохьэпIэ хэхыныгъэ зыфиIорэ партием хэт Кулокова Эльвира, Адыгэ дунэе лъэпкъ-культурэ гупчэу «Фитыныгъэр».
Фитыныгъэ радиом игущыIэгъугъэ израиль политологэу Шмулевич Авраам къыхигъэщыгъ, Украинэм фэгъэзэныгъэ зыкIыфашIыгъэмкIэ ыкIи джы дэдэм ащ зыкIыфагъэзагъэмкIэ:
Фитыныгъэ радиом игущыIэгъугъэ израиль политологэу Шмулевич Авраам:
— Украинэр Кавказым, адыгэхэм зэпхыныгъэ пытэ адызиIэ къэралыгъу. ЫкIи Украинэр дунаим щыпсэухэрэм анаIэ игупчэ ит къэралыгъу. Сегупшысэ, тилъэIу агъэрэзэнымкIэ зэшIокIышхо щыIэу. Украинэр ежь Урысые агрессием къычIэфагъэхэм джы дэдэм ащыщ, адыгэхэр илъэс I50 узэкIэIэбэжьмэ агрессиеу къызхиубытэгъагъэм фэдэу. Ащ къыгурыIонэу щыт адыгэхэм ялыуз.
Фитыныгъэ радио:
Авраам, адыгэхэмрэ украинэ цIыфхэмрэ язэфыщытыкIэхэм къатедгъэзэжьмэ, сыд фэдэ щысэха къэпхьын плъэкIыщтхэр?
Фитыныгъэ радиом игущыIэгъугъэ израиль политологэу Шмулеыич Авраам:
— Украинэр шъыпкъэу пIощтмэ, Кавказым гъунэ дызиIэ къэралыгъу. Адыгэхэмрэ украинэ цIыфхэмрэ язэфыщытыкIэхэр илъэсишъэм къыдхэлъытагъэх. Тарихълэжьыбэмэ зэралъытэрэмкIэ, адыгэхэм мэхьанэшхо зиIэ Iахь халъхьагъ украинэ къэзэкъыныгъэр гъэпсыгъэ хъунымкIэ. Къэзэкъхэм черкаскIэ яджэщтыгъэх. ШIэныгъэлэжьыбэмэ зэралъытэрэмкIэ, украинэ лъэкъуацIабэхэр адыгэхэм къатекIы. ГущыIэм пае, украинэ лъэкъуацIэу Шевченком адыгэ лъапсэ иI – Шэуджэн «динлэжь» къикIырэр. ГущыIэ кIэухэу «ко» зыфиIорэу украиныбзэм зыгори къызэрымыкIрэм «къо» зыфиIорэм адыгабзэкIэ «ыкъу» къекIы.
КъэпшIэжьынэу щыт адыгэхэр урысые тарихъым икъэхъу-къэшIэ зэфэшъхьафхэу зыхэлэжьагъэхэр – адыгэ дзэхэр зыхэлэжьэгъэ Казан иштэн къыщегъэжьагъэу Полтавэ зэоным нэс.
Фитыныгъэ радио:
КIэлъэIур Украинэ Парламентым ыгъэрэзэнымкIэ охътэ тхьапшым уежэнэу щыта?
Фитыныгъэ радиом игущыIэгъугъэ израиль политологэу Шмулеыич Авраам:
— СыкъызэрэщагъэгъозагъэмкIэ, тхьапэр Турчиновым ратыгъах. Украинэ политикэ IофышIэхэри, бэдаушхэри мы Iофым зишIогъэшIэгъон хэлъхэр щыIэх. Украинэм иIэкIыб IофхэмкIэ Iахьри щыгъуаз мы Iофыгъом. Сэ сэгугъэ, мы илъэсым ыкIэм нэс адыгэ лъэпкъгъэкIод къэштэныгъэр щыIэщтэу.
Фитыныгъэ радио:
Авраам, о зэрэплъытэрэмкIэ, Украинэм къыщыблэгъэрэ къэралыгъо Iэшъхьэтет хэдзынхэм зыгорэущтэу къэштэныгъэм ифэмэ-бжьымэ техьан ылъэкIыщта?
— Хьау, сыда пIомэ мы упчIэр зыштэрэр Радэр ары. Щыхахрэр ащ – Iэшъхьэтетщтыр ары. Парламент хэдзынхэр зыщыщыIэщтхэр джыри шIэхэп. Сыд мыхъуми, Турчиновыр унэшъошIым къыхэнэщт. Ащ зыфэтэгъазэ парлыментариеу зэрэщытым фэдэмкIэ.
Фитыныгъэ радиом игущыIэгъугъэ израиль политологэу Шмулевич Авраам зэрилъытэрэмкIэ, Украинэм къыщыуцущтэп Iофыр. Фэшъхьаф къэралыгъохэм япарламентхэми фэдэ кIэлъэIухэр афарагъэхьыгъэ хъущтых.
Фитыныгъэ радио, Щэрджэс Ларис.
