Сергей Багапш, Абхазием ипрезидент, Тыркуем кIуагъэу илъэпкъэгъухэм щаIокIэ. Мы мазэм и 7-м ар къухьлъатэкIэ къэралыгъом икъэлэ шъхьаIэу Анкъара нэсыгъ, ащ лIышъхьэм абхъаз, кавказ (адыгэ) хасэхэм яфедарациемэ ялIыкIохэр щыпэгъокIыгъэх.
ЯтIонэрэ мафэм Сергей Багапш адыгэ-абхъаз куп зэхэт, ахэмэ хасэхэу зэхащагъэмэ ахэтхэр игъусэхэу нэпэрэ Тыркуе республикэр зыгъэпсыгъагъэ Ататюрк икъэунэ (аныткъабыр) щыIагъэх. А мэфэ дэдэм Анкъара дэс илъэпкъэгъухэмрэ кавказ лъэпкъхэм я диаспорэ щыщхэмрэ зэIукIэшхо адишIыгъ.
Мы зэIукIэмкIэ Багапш Абхазием идиаспорэ зэригъэлъапIэрэр ыкIи ихэку къэзгъэзэжьын зимурадхэм IэпэIэгъу зэряIэщтыр къыщыкIигъэтхъыгъ. Ащ нэмыкIэу Абхазием щеджэн зыгу хэлъ абхаз кIэлакIэхэми ящыкIэгъэ IэпэIэгъур зэрэзэрагъэгъотышъущтыр къариIуагъ.
Ящэнэрэ мафэм Тыркуем щыпсэурэ абхаз диаспорэр нахьыбэу зыдэс Закъарие къалэм лIышъхьэр кIуагъэ. Мы къалэмкIэ апэ зэкIолIагъэр Цыбэ Эфкъан зыщагъэтIылъыжьгъэ чIыпI, ар Абхаз-къурдж (грузин) заом апэ кIогъагъэмэ ащыщэу, лIыгъэ хэлъэу ичIыгужъ щыфэхыгъагъ.
Мыщ ыуж президентым IузунджаIорман зыфаIорэ абхаз чылэм илъэпкъэгъухэм защыIуигъэкIагъ.
Багапш имызгъэгурэ кIон Тыркуе IэкIыб IофхэмкIэ иминистерстви къытегущыIэ. Ащ исайт къэбарыр къызэритырэмкIэ, лIышхьэр къэралыгъо пшъэрылъ темылъэу, ежь-ежьырэу Тыркуем ихьагъ. Анахьэу зыфэкIуагъэу къаIорэр – ипсауныгъэкIэ уплъэкIунхэр аригъэшIынэу ары.
НэмыкIэу сайтым итхыгъэ къыхигъэщырэр – Тыркуе къэралыгъом къыгурэIох Къурджым зыкIыныгъэмкIэ къынхэу зэпичыхэрэр.
natpressru.ru
