Тэрэз, «Адыгэ Хасэм» изэфэсэу июным и 30-м Мыекъуапэ щыкIуагъэм Iофыгъо инхэр къыIэтыгъэх. Ахэр зэшIуихыгъэхэуи пIон плъэкIыщт. Ау етIани, ежь зэфэсым тхьамыкIашъо теоу кIуагъэ. Ар аущтэу къэзышIыгъэр цIыфэу къекIолIагъэм ипчъагъ. Бэдэдагъэп щыIагъэр. Ау ащи зи къепIолIэн плъэкIыщтыгъэп къэкIуагъэхэр, зэфэсыр окIофэ, залым чIэсыгъэхэмэ. Зырызэу тэджыжьхэзэ, чIэкIыжьщтыгъэх.
Сыда мыхэмэ къямыкIугъэр? Ахэм къуаджэмэ къарыкIыгъэхэри ахэтыгъэнба? Iофы зебгъэшIэу укъэкIуагъэмэ щысба рэхьатэу. Хьау, зыгорэ афэмыщэчышъунэу къыщыхъугъ. Джащ зэкIэхэмкIэ тегупшысэн фай. Ар тымылъэгъугъэм фэдэу зыпшIыкIи хъунэп.
Апэрэхэм чIэкIыжыныр зырагъэжьагъэр – Бъэгъушъэ Адам изэфэхьысыжь псалъэ къышIызэ. Ахэм къямыкIугъэмкIэ зытеплъхьан плъэкIыщтыр – иадыгэбзэ къэгущыIакI, иурысыбзэ техьажьыкI.
Хэта зигопэщтыр «сыда пIомэ» зыфэпIощтым ычIыпэкIэ «потому что» фэдэ гущыIэхэр ренэу бгъэфедэхэмэ? Ари «Адыгэ Хасэм» уритхьэматэу. Ари зэфэсым укъыщыгущыIэу.
КъэIогъэн фае, аужыпкъэрэ Хэсашъхьэм изэхэсыгъомкIэ «бзэр» ары анахь лъэшэу зыкIызэнэкъокъугъэхэр. Ежь Бэгъушъэм псалъэу къышIыщтым щыщэу зыкуп урысыбзэкIэ къасIомэ нахьышIу ыIуи къызахедзэм, дырагъэштагъэп. Iэ Iэти ашIыгъ – къикIыгъэр зэкIэ къыIощтыр адыгэбзэн фае.
Аущтэу тхьэматэм Хэсашъхьэм иунашъо риутыжьыгъэмэ а чIэкIыжьыгъэхэм амышIэщтыгъэми – иурысбзэ къэгущыIакIэр зэрямыгопагъэр умылъэгъу фэдэу зыпшIыми хьаолый.
Сэ сшъхьэкIэ чыжьэу сыкъыкIи зэфэсым сыкъэкIуагъэп. Ау джа апэ чIэкIыжьыгъэхэм сащыщыгъ. СыкъызчIэхьажьым ызыныкъо горэ чIэсыжьыгъэми ары.
Тхьам нэмыкI къин тыхэмыгъаф, ау тапэ илъыр хэта зышIэрэр? Зыгорэ къызыхъук1э, сыдэущтэу цIыфхэр тыугъоищтха?.. АщкIэ Бэгъушъэ Адам къыIорэр шъыпкъэ – «Адыгэ Хасэм» реорганизацие ищыкIагъ. Ау а зэхъокIыныгъэхэр ежь къыщемыжьэмэ зи къыкIыщтэп.
Щэш1э Аслъан, natpressru.ru
