Адыгэ хэгъэгу Хасэм июным и 30-м Мыекъуапэ щыкIуагъэм мы джэпсалъэр щызэдаштагъ ыкIи ащ ыуж Хасэм итхьаматэу Бэгъушъэ Адамрэ Адыгэ хэкум ыкIи Пшызэ шъолъырым ащыпсэурэ быслъымэнхэм ямуфтиеу Емыж Нурбийрэ зэдыкIэтхагъэх. Джэпсалъэр зыфэгъахьыгъэр «непэ мэстапэм пылIыхьэрэ сабыйхэр, бэшэрэбым, машинэ псынкIэхэм якIодылIэхэрэ тикIалэхэр ары».
Лъэпкъ гумэкIхэм, лъэпкъыбзэм, шэн-хабзэхэм, лъэпкъым изыужьыжьын, лIэшIэгъубэхэм къыздырахьакIыгъэ быслъымэн диным ылъэ итегъэуцожьын, динри адыгабзэри еджапIэхэм ачIэлъхьэгъэным афэгъэхьыгъэ Джэпсалъэу «Мардж!» зыфиIоу лъэпкъым факIорэр.
Тинахьыжъхэу, тиакъылхэу, лъэпкъым ыгъашIохэу, иупчIэжьэгъухэр!
Шъоры ныбжьыкIэхэм ящысэу, ягъунджэхэр. Шъоры лъэпкъым икъин изехьакIохэр, ихъярхэм якIэщакIохэр, шэпхъэшIу пстэуми яpзехьакIохэр. Непэ тиныбжьыкIэхэм бэлахь шъобжэу къапекIокIыхэрэр щытэжъугъэгъэзыех. Аркъым, кIэпым къахэкIэу зигъонэмыс хъурэ тисабыйхэр къэтэжъугъэухъумэх.
Тибзылъфыгъэхэу тилъапIэхэр! Шъо Алахьталэм шъуигъэлъэпIагъ.
Унагъохэм ярэхьатныгъэрэ сабыйхэм япIунрэ шъо Алахьым шъупшъэ къырилъхьагъ. Сабыйхэр нурэу, мамырхэу, гукIэгъухэу шъупIунхэр, шъулэжьынхэр шъо шъуипшъэрылъ шъхьаI. Тибзылъфыгъэ лъапIэхэр, сабыипсэм нахь лъапIэу ным сыда къыIощтыр?! Ным ыбгъэшъо фабэ хэта щамыпIугъэр?! Тшыпхъухэр, сабыипсэм иIэшIугъэ зыхэшъумыгъэн!
Тисабыйхэр мэстапэм (наркотикхэм), бэшэрэбым, машинэ псынкIэхэм апкъ къикIэу игъонэмысэу чъыIэм етэшъумыгъэгъэкIужьых. Ным, тым яанахь мэфэ къиныр ежьхэр псаухэзэ ясабый чIы чъыIэм рагъэкIужьыныр ары. Тисабыйхэр бэлахьхэм ащытэжъугъэухъумэх.
Тигъэсагъэхэр, тиакъылхэр!
Шъоры гъэсэныгъэм, шIэныгъэм якъэкIуапIэхэр, шъоры дунэе шIэныгъэм тисабыйхэр, тилъэпкъ фэзыщэхэрэр. ШIэныгъэр Тхьэм ыгъэлъэпIагъ, ащ тыхэшъумыгъэн. Тисабыйхэр шIэныгъэ ямыIэу къэтэшъумыгъэгъанэх, шIэныгъэ зимыIэр нэшъоу къызэрэнэрэр агурытэжъугъэгъаIу. Шъоры лъэпкъым ишIэныгъэр, инеущыр. Шъобжэу шъон пытэхэм, наркотикхэм, машинэ зэутэкIхэм тиныбжьыкIэхэм ахахыхэрэр тинэрылъэгъу мэхъу къэхалъэхэм узадахьэрэм. ТышъолъэIу шIэныгъэм, гъэсэныгъэм къапкъырыкIэу а гумэкIыгъор нахь макIэ хъуным екIолIэпIэ зафэхэр къафэжъугъотынышъ, лъэпкъым лъыжъугъэIэсынэу. Тисабыйхэр кIодыпIэхэм ащышъуухъумэнхэу, къарышъущынхэу тышъущэгугъы.
Титхьаматэхэу типащэхэр!
Непэ тиныбжьыкIэхэр игъонэмыс зышIыхэрэ наркотикхэм, шъон пытэхэм, машинэхэм яшъхьафитыджэ зекIуакIэ лъэпкъым инеущырэ мафэ якIодылIэ. Тышъоджэ, тышъолъэIу законыр гъэпытэгъэным, ар гъэцэкIэжьыгъэным гъунэ лъышъуфынэу. Наркотикхэр хэбзэнчъэу къезыгъэкIокIыхэрэм, шъон пытэхэм ящэн пылъ шапхъэхэр зыукъохэрэм икъоу пшъэдэкIыжь ягъэхьыгъэным гъунэ лъышъуфынэу. Непэ мэстапэм пылIыхьэрэ сабыйхэри, бэшэрэбым, машинэ псынкIэхэм якIодылIэхэрэри тэ тикIалэх, ахэр лъэпкъым ианахь лэжьыгъэшIоу, инеущырэ мафэх.
Шъоры лъэпкъым ыпэ итхэр, титхъагъохэри тикъинхэри шъоры зыпшъэ илъхэр. Къинхэм лъэпкъыр ащышъуухъумэнэу, хъярхэм афэшъущэнхэу Тхьэм амалхэр къышъуитын.
ТиныбжьыкIэхэу тинеущырэ мафэхэр!
Шъоры лъэпкъым илъапIэр, инеущырэ мафэр. Тэ тышъорэгушхо ыкIи тышъуфэлъаIо мамыр хъярхэм Тхьэм шъуафиузэнкIынэу, псауныгъэ, бэгъоныгъэ къышъуитынэу, шъуигъашIэр гъэшIэ кIыхьэу, шъуижъышъхьэ жъышъхьэ мафэ хъунэу. Тыкъышъоджэ ыкIи тышъущэгугъы адыгэ лъэпкъыр жъугъэбэгъонэу, ыцIэ дахэкIэ ряжъугъэIонэу. Непэ лъэпкъым хэкIырэр нахьыбэ зэрэхъугъэр шъоры зихьакъыр. Ешъоным, наркотикхэм, машинэ псынкIэхэм къапкъырыкIэу шъукъэмыхъузэ игъонэмысэу шъокIодыжьы, тиныбжьыкIэ кIасэхэр! Чiыгу дышъэу тызыщыпсэурэ Кавказыр, дунэе джэнэтыр хэта къызфыщышъунэрэр? Адыгэ лъэпкъыр мыкIодыжьыныр шъоры зипшъэрылъыр, шъоры зиамалыр. Тилъэпкъ къэтэжъугъэухъумэн, тэжъугъэгъэбагъо.
Адыгэ хэгъэгу Хасэм итхьаматэу Бэгъушъэ Адам
Адыгэ хэкум ыкIи Пшызэ шъолъырым ащыпсэурэ быслъымэнхэм ямуфтиеу Емыж Нурбий
natpressru.ru
