KАФФЕД (СМИ) 13-01-2012 — Сирием щыпсэурэ Адыгэхэм ащыщ горэхэр Адыгеим къагъэзэжьынэу зэрэфаехэм пае Каффед-ым ипащэхэр Урысые къэралыгъом илъыкIошъхьаIэу Тыркуем щылажьэрэ Владимир Ивановскэм IукIагъэх.
Каффед-ым итхьаматэу Уаджит Къадыогълур зипащэ купыр посольствэм кIуи, Урысые къэралыгъом илъыкIошъхьаIэу Владимир Ивановскэмрэ ащ иупчIэжьэгъоу Александр Епифановым дэгущыIагъэх.
Сирием ис Адыгэхэм ащыщ горэхэр яхэку къагъэзэжьынэу зэрямурадыр, тхыгъэу ар Адыгеим и Къэралыгъо Хасэм зэрэфагъахьыгъэр ыкIи Адыгеим и Къэралыгъо Хасэри мы Iофым джэуапэ фэхъунэу зэрэпылъым зэIукIэм игугъу щашIыгъ.
Мы Iофым Каффед-ыми зэрэдыригъаштэрэр ыкIи ащ ехьылIагъэу Урысыем и Гупчэ Правительствэм макъэ рагъэIункIэ ишIуагъэ къыгъэкIонэу зэрэгугъэрэхэр Къадыогълум УрысыемкIэ лъыкIошъхьаIэу Владимир Ивановскэм риIуагъ.
«Сирием щыпсэурэ адыгэхэм ащыщхэм хэкужъым къагъэзэжьын агу хэлъ, ахэмэ Хэкужъым исхэр ягуапэу пэгъокIыщтых ыкIи Урысые къэралыгъом мыхэм IэпэIэгъу афэхъунэу къатефэрэр афишIэныр шъуашэ, етIани ащ охътэ лые тебгъашIэ хъущтэп», — ыIуи, игущыIэхэм къахигъэщыгъ Къадыогълу.
Ащ ишIошIыкIэ, Урысые Гупчэ Думэмрэ, Адыгеим и Къэралыгъо Хасэмрэ, Къэбэртэе-Бэлъкъаррэ, Къэрэщыэе-Щэрджэсрэ япарламентхэмкIэ мыщ фэгъахьыгъэ гъэнэфэгъэ-теубытагъэ зыхэлъ къэрарыр зэдаштэн фае. Ицыхьэ телъ, ащ тетэу мыпсэухэмэ, мыщ ыпэрэм Косовэм адыгэхэр къызэрэращыжьышъугъагъэм фэдэу 1офыр зэпагъэфэн амылъэк1ынэу.
Владимир Ивановскэм мы зэIукIэр игъом зэрэкIуагъэр, щаIуагъэхэр Москва ащ фэдэ Iофхэм фэгъэзагъэхэм зэранигъэсыжьыщтыр къыIуагъэмэ къахигъэунэфыкIыгъ.Хэкужъым агъэкIуагъэу щеджэрэ студентхэм проблемэхэу яIэхэм яхьылIагъэу Каффед-ым иеплъыкIэхэр зэIукIэм кыща1уагъ. Ащ нэмык1эу 2014 илъэсым Шъачэ щыIэщт олимпиадэм ехьылIагъэу Черкесмэ гумэк1ыгъоу я1эхэми тегущы1агъэх.
ЗэзыдзэкIыгъэр Ацымыжъ Хьылми,
natpressru.ru
