Мэзаем и 8-м Къэбартае-Бэлькъар республикэм икъэлашъхьэ Нальщыкъ Шъачэ олимпиадэм пэуцожьэу мырэзэныгъэ зэхахьэ щыкIуагъ. Ащ полицием нэбгрэ 30 фэдиз ыубти хьапсым чIидзэгъагъ. Мыхэм янахьыбэр атIупIщыжьыгъэх. Непэ нэбгритIур джыри хьапсым зэрэчIэсых, къеты къэбарыр «Сircassiatimes.blogspot.ru» зыфиIорэ сайтым.
Мырэзэныгъэ зэхахьэм щаубытгъагъэмэ ащыщых Сирие заом къыхэкIыжьыгъэу хэкум къэзыгъэзэжьыгъэу студент нэбгрищыр. Мыхэм къызэраIуагъэмкIэ зэхахьэм хэлэжьэнхэу агу хэлъэгъэп ыкIи ар зэрэщыIэр ашIагъэп. ЧIыпIэу зэхахьэр зыщашIыгъэм блъэкIыхэ пэтзэ полицием ыубытыгъэх.Зымафэ аIыгъэхи етIанэ атIупIщыжьыгъэх, ау полицием дао судым афычIилъхьи хэкум рафынхэу унашъо ригъэшIыгъ.
КъБР-м ихэку къэзыгъэзэжьыгъэхэм адэлажьэрэ хасэу «Пэрыт» зыфиIорэм судым тхьапэхэр чIилъхьагъ унашъор къызэкIэгъэкIожьыным пае. «Пэрытым» итхьэматэ Хьэгъэжъый Беслъан къызэриIуагъэмкIэ судым иунашъо зэкIимыгъэкIожьымэ къэзыгъэзэжьыгъэхэр зы тхьэмафэкIэ хэкум рафыжьыщтых.
