Мы тхыгъэр къытIэкIэзгъхьагъэхэр – Тыжъ Илкаеу бэмышIэу зидунай зыхъожьи Мыекъуапэ щыдгъэIылъыгъэм иныбджэгъух. КIалэр игъонэмысэу тхэкIыгъэми, лъэпкъ Iофхэм ауж ит зэпытэу, лъэгъо нэф шIагъо ышIыгъ, зэтыригъэпсыхьагъ – ары Тхьам ыпашъхьэ рихьажьыгъэри. Арышъ, Тхьам ыIомэ, а гъогоу къыгъэлъэгъуагъэр шъхьапэ тфэхъун, рыкIон пчъагъи дгъотын.
«Тыжъ Джамилрэ, Хьащпакъ Хьанданрэ ябын нахьыжъэу 1976 илъэсым Бэдзэогъу мазэм и 30-м Тыркуем и Аксарай къалэм къыщыхъугъ. ЕджапIэр Мерсин къалэм къыщиухыгъ. 1995 илъэсым Истамбыл къалэм Мармара университетым чIэхьагъ. Илъэс 2000-м инженерэу университетыр къиухыгъ. А лъэхъаным ыуж Истамбыл къалэм дэт Адыгэ Хасэхэм къыхэщэу щылэжьагъ.
Адыгагъэм, хабзэм пылъэу, фэщагъэу шIогъэшIэгъонэу, ишIэныгэхэмкIи иныбджэгъухэм адигощыщтыгъ. И хабзэрэ и цIыфыныгъэрэкIэ кIалэ-гъуалэмэ ятхьаматагъ. Бзэм, тхыдэм, Адыгэ культурэм телэжьыхьагъ, документ Iаджи къыгъотыжьыгъ. 1700-1921-рэ илъэсхэм Кавказым Адыгэхэр зыщыпсэугъэ чIыпIэжъхэр, 1921 гъэм ыуж Кавказым Адыгэхэм псэупIэкIэ яIэ хъугъэ чIыпIэхэр, Тыркуем Адыгэхэр зыщыпсэурэ къуаджэхэр къыгъэлагъэу картищым лъэшэу Iоф адишIагъ.
Адыгэ пщыналъэм фэIэзагъ. 1997 илъэсым щегъэжьагъэу 2013 илъэсым азыфагу Истамбыл Университетым икъашъуакIо купым пщынаоу ахэтыгъ. Ащ нэмыкIэу 2000 илъэсым щегъэжьагъэу 2002 илъэсым азыфагу «Нарт» икъашъуакIо купым, 2002 илъэсым щегъэжьагъэу 2006 илъэсым азыфагу купэу «Ридадэ» зыфиIорэм пщынаоу ахэтыгъ.
1998 илъэсым щегъэжьагъэу 2013 илъэсым азыфагу снабженцэу, инженер-проектировщикэу лэжьагъ.
Адыгабзэ, Тыркубзэ, Урысыбзэ, Инджылызыбзэ ишIэщтыгъ.
И Хэкужъым апэу 1993 ятэ игъусэу къэкIуагъ. 2009 илъэсым ятIуанэрэу къызэкIом и Хэкужъ итIысхьажьын Iофыгъом фежьагъ. «Вид на жительство» зэриIэм пае мэзих къэс къакIоу ышIыщтыгъ. 2011 илъэсым мэзихырэ Мыекъуапэ щыпсэугъагъ.
2013 илъэсым Гъэтхапэ мазэм иапэрэ мафэм сыхьат 02.10 м Адыгэ къэрэлыгъом икъалэшъхьаIэ Мыекъуапэ дэкIэу Краснодар къалэм кIоу Пэнэжъыкъуае блэкIызэ аварием хэфагъ. ЗанкIэу Адыгэкъалэ дэт къэлэ сымэджэщым ащагъ. Апэ зауплъэкIум ищыIэныгъэ изытет щынэгъончъэу агъэунэфыгъ. Ящэнэрэ мафэм итхьабыл уIагъэкIэ жьы къымыщэшъу зэхъум реанимацием чIагъэгъолъхьагъ. Реанимацием мэфищэ чIэлыгъ ыуж нахьышIу хъужьыгъэу къычIащыжьыгъ. Яти, иныбджэгъухэри фэгушIохэу къэхъужьыгъ, ежьи сэмэркъэу къышIэу фежьэжьыгъ. Ау я 9-рэ мафэм дэи хъужьыгъ. Томографие зытрахы нэуж Краснодар сымэджэщым операцие фашIынэу ащагъ. Операцие дэгъоу блэкIыгъ шъхьаем, сыд хъугъэми, Илкай тхьамыкIэр псаоу къэнагъэп. Гъэтхапэ мазэм и 13-м сыхьатыр 04.40-м идунай ыхъожьыгъ.
Къэбар гукъаор Тыркуми Хэкуми псынкIэдэдэу щызэхахыгъ. Бэ темышIэу иныбджэгъухэм ащыщэу нэбгырэ 30 Туркуем къикIи къэсыгъ. Тыркуеми, Къэбэртаеми, Абхъазыми щыщхэу цIыфыбэ къекIолIагъ Илкъай агъэтIылъынэу. Ащ къегъэлъагъо ар шIудэдэу зэралъэгъурэр, цIыфыбэм шапхъэ зэрэфэхъугъэр.
Дунаим зыщехыжьыгъэ мафэм и пчыхьэм хьадэр Мыекъуапэ Дыгъ Мирач иунэ къырахьылIагъ, ят1онэрэ мафэм ащ дэжь щаIэтыри агъэтIылъыжьыгъ.
Иунагъоми къыгъэлъэгъуагъ агурэ апсэрэ яхэкужъ зэрэщыIэр. Ащ ителъхь Илкай ихэкужъ щагъэтIылъынэу унашъо зэрашIыгъэр. Авариер зыщыхъугъэм щэгъэжьагъэу хьадэр агъэтIылъыжьыфэ, ащ ыужи хабзэ зэрахьагъ.
Дгъэпсыщт унэм и апэрэ этажыр тIоу гощыгъэу щытыщт. Ызыныкъорэр (80м2) Илкай ыцIэкIэ гъэпсыгъэу Адыгэ культурэмрэ, Адыгэ тхыдэмрэ фэгъэзагъэу хъущт. Ащ нэмыкIэу къэзгъэзэжьыхэрэмэ яадаптацием фэлэжьэн зэхэсхэм чIыпIэ афэхъущт. Адрэ ызныкъори (90м2) Тыжъмэ япсэуалъэу щытыщт. Унэм иятIонэрэ этажыр къэзгъэзэжьын зыгу хэлъхэмрэ, къэгъэзэжьын Iофыр езгъэжьагъэхэмрэ псэупIэ афэхъущт. ЦIыфхэр икъоу къыхэлажьэхэ хъумэ, ящэнэрэ этажри тшIы тшIоигъу. Ащыгъум нэбгырэ 36 зэгъусэу щыпсэушъущт а унэм. ЦIыфхэм щызэрэмыхьэ уахътэхэм пансионат фэдэу уасэкIэ пты хъущт. Ащ къыхэкIырэ ахъщэр къэгъэзэжьын Iофыгъом пылъ нэмыкI проблемэхэм фагъэкIодыщт финансэу зэрахьащт».
Кушъхьа Филиз, ЛIыгуащIэ Умит
natpressru.ru
